كل واحد أكيد عنده هواية بيحبها ويفضلها عن غيرها.
أنا مثلاً عن نفسي وأنا من زمان بحب أوي تجميع العملات.. يعني عندي عدد كبير أوي من عملة التعريفة القديمة.. معلش اعذروني أنا راجل قديم شوية.. بس الغريبة إني ماكنتش واخد بالي إن الموضوع ده هواية ولا كنت عارف أصلاً أنا بجمعهم بالأعداد الكبيرة دي ليه؟!

الموضوع بصراحة جه بالصدفة البحتة وده اللي حيخليني أقولكم الحكاية أصلها إيه.

زمان كنت باخد مصروف يعني هو قليل بتاع 5 قروش فكنت بجيب عسلية لأني بحبها أوي.. والعسلية بتاعة زمان دي كانت مختلفة تماماً عن عسلية اليومين دول كان في جواها عملة التعريفة دي فكنت بجمع واحدة ورا التانية لغاية ما بقى عندي تعريفات كتييييرة أوي ولسه محتفظ بيهم لغاية دلوقتي.. ده طبعاً غير العملات اللي بجمعها من دول تانية ومن فئات برضه مختلفة.

فيه حد هنا بيحب يجمع العملات زيي بأعداد كبيرة.. ابقوا قولوا لي.