الحمد لله فقرة "حكم القوي" في برنامج "كل ليلة " اللي بقدمه بدأت تلاقي اهتمام أكتر وتجاوب مع الناس.
الفقرة دي بالتحديد أنا فرحت عشانها لأني بحب جداً أهتم بمشاكل الناس الغلابة لأني بضعف أمامهم، ماليش أوي في الناس الشيك والإتيكيت لكن بتمنى ربنا يقدرني وأقدر أساعد أي حد ضعيف أو غلبان أو مش عارف يوصل لحقه .
على فكرة الفضفضة كمان حاجة مريحة جداً بشكل عام ، لدرجة وأنا بسمع لمشاكل الناس وخصوصاً العاطفية بقيت عارف ومتأكد أنهم أصبح عندهم الخبرة عشان يعرفوا حل المشكلة بس منتظرين حد يديهم دفعة لخطوة جد ، والناس بقى عندها وعى وخبرة بجد بحل المشاكل ودا في حد ذاته شئ رائع.
أكتر المشاكل اللي بتأثر في وبحس تجاهها أني مش عارف أرد عليها لما بتكون مشكلة قدرية ... حلها مش ممكن يكون بكلمة أو نصيحة وخصوصاً لما بيكون في مرض .
الأسبوع اللي فات كان في قصة بجد رغم أنها مش عاطفية بس أثرت في جداً ومش عارف ليه الناس وصلت للوضع دا ....كانت ست طيبة جداً وقفت جنب إبنها وعملت المستحيل عشان تجوزه وفعلاً أتجوز معاها في شقتها ودلوقتي عاوز يطردها ... بالزمة دي الأخلاق ، هى ضحت بكل شئ وهو دلوقتي عاوز يضحي بيها، بجد ربنا يكون في عونها مش بس عشان مشكلتها دي ، لكن كفاية الألم اللي بتشعر بيه من أقرب إنسان ليها.