اللون الأحمر كان الشئ اللي ميز عيد ميلادي السنة دي واللي احتفلت بيه قريب مع عيلتي وصحابي في كافيه في المهندسين ، وكان أهم ملاحظة قالوهالي صحباتي أن اللون الأحمر هو الغالب في الحفلة، لأني كنت لابسة حزام أحمر عريض على الفستان ،كمان جزمتي كانت حمرا، وتورتة عيد الميلاد كانت باللون الأحمر كمان، بس كان يوم جميل جداً فضلنا نغني ونحتفل لحد بالليل. وأنا بجد سعيدة مش عشان الحفلة ولا عشان عيد ميلادي بس عشان قضيت وقت حلو مع صحباتي وعيلتي كمان من زمان مسهرناش ولا خرجنا كدا ، وبشكرهم بجد على هداياهم الجميلة...

بالرغم من الشهرة والنجاح اللي حققتهم في فترة معقولة بفضل ربنا سبحانه وتعالى وحبكم ليا إلا إن حياتي ماتغيرتش كتير بعد كده. أغلب وقتي لسه بقضيه مع صحباتي بنتقابل في بيت أي واحدة فينا وأغلب الوقت بيكون معايا أخواتي لأن كلنا في سن متقارب أوي من بعض. قعدتنا غالباً بتكون إننا بنسمع أغاني ونرقص ونتكلم وكل واحدة فينا بتحكي عن اللي عملته خلال الأسبوع.. طبعاً إنتوا عارفين حكاوي ورغي البنات بيكون عن إيه:)) أكتر حاجة فعلاً بحبها وبحب أحافظ عليها إني دايماً أجتمع مع إخواتي وبالذات لما بناكل من إيد ماما...